Anita & Louie 旅遊手記: 高雄墾丁 Day one

2012-04-23~Monday

超勁太陽 Day one <高雄巿~旗津~六合夜巿>

05:25到屋企樓下坐N26差d錯過班車，多謝司機叔叔見我兩公婆拖著兩個篋係咁追等埋我地唔該哂。

06:10 到機場，已經有好多人，不愧係國際機場好犀利。
H line 港龍check in KA432 gate 49, 08:35 boarding ，地勤姐姐好快手攪掂哂，可以去潮樓嘆返杯早茶添。
原本09:00起飛有2名乘客無上機，要遲咗成40mins先至可以起飛。
今次係機上有Baby 狂哭la、狐仙啦，好在機程只係60分鐘左右 (如果唔係就……)。

10:40到高雄機場啦，因我哋係香港網上做定入台證，所以係高雄機場過關超方便又快。過關後係高雄入境果邊兆豐銀行換錢💰(HK$1~TWD$3.65)，我哋換咗HK$5000，步出機場外睇下 “格上”租車嘅位置，坐捷運去高雄車站TWD$20去到。
大約12:00到，先check in放行李 (因要15:00先有房)，服務員姐姐問我哋現時想去邊，比咗一張簡便地圖教我哋坐捷運到西子灣站TWD$20去<旗津>。

12:30到西子灣站上到地面有位好熱誠嘅租單車的推銷員，比咗張旗津小地圖我哋，佢話行旗津要4 hours以上都行唔完，踏單車會方便啲，可以係呢度租車坐船過去，最後我哋都係選擇行下，去坐船，原來 “鼓山輪渡站 ”係人車 (電單車) 同船，人嘅費用TWD$15，自己入錢，講個信字，車漏咗無睇添sorry。
由西子灣到旗津船程3分鐘，海景超正，旗津碼頭嘅設計都好靚，同時都有好多海鮮檔，旗津旅遊指示好清楚，我哋向指示牌方向行，太陽伯伯超勁，老婆好醒，帶定行山三寶(傘、扇、水)，條海鮮街真係好多海鮮檔，同時海鮮價都可接受，平過HK。

13:30我哋隨緣入咗間 “旗后” 海產店食午餐，以下就係我哋嘅菜單啦，三杯鮮魷、鹹蛋炒苦瓜、鹽酥墨魚咀、炒海瓜子、炭燒魚下巴、台灣啤酒x2大枝，多謝TWD$810(HK$224)👍👍

15:00飲飽食醉後係散步嘅時候啦，太陽伯伯依然好強勁，我哋都唔行得太多，只係去咗 “旗津海水浴埸”，沙是黑沙色嘅、旗津星空隧道、旗后山景觀步道 (好不幸我係途中比黑色細細粒（吸血鬼）偷襲我條美腿)、燈塔 (好可惜參觀唔到因星期一休假中)，不過要行哂旗津的話，踏單車真係會舒服好多。

18:09返到酒店攞房，沖返個靚涼，爽呀。
19:30出門去六合夜巿揾吃lu，六合夜巿幾闊落係遊客必到嘅夜巿，我哋食過雞腿串，魚湯魚下巴米線，鮮榨甘蔗汁、木瓜牛奶、臭豆腐、小籠包，全部都yummy………😘😘😘
其實六合夜巿有好多嘢食架，不過不能在此盡錄sorry。
不過原來高雄另一個嘅<瑞豐夜巿>星期一同四係休息嘅(大家要留意呀)。
21:30今日嘅行程都好精彩呢，係時候返酒店覺豬，明天再見。