Anita & Louie 旅遊手記: 新加坡、馬爾代夫8天之旅--20週年紀念 day 3

2012/11/30 Friday Day 3天晴 ☀

0600 起床，不要意為好早，梳洗、執行李、check out、0710行去Bugis station，0720 上車、0755Airport station落車、0815 check in 完, 意為可以吃早點、錯！要0845 boarding ( 0945 flight) ，行到去F58 gate已經0830，見airline 櫃位前才檢查手提行李，我諗是0845 boarding 的原因，你唔好話它早，檢查完手提都已經0915，剛好登機。

溫馨提示，上機不要吃太多東西，因為機上好多嘢吃，食不停，小吃，飛機餐，名牌雪糕條，所以travel channel ( Singapore airline ) 送給我倆的 anniversary cake 吃不下，打包擰走!

機程都4個多鐘，當地時間大約1125 （與香港相差3小時, 香港是1425）到馬爾代夫首都馬里，從飛機看下去，好似一個油尖旺咁大的長島飄浮在水上，機場好隨意，我地落咗機就係跑道行入去機場大樓取行李過入境處，出到嚟即見The Residence 黑色的職員舉起酒店牌子等我們，原來還有4位朋友未出來，等陣先，等一陣出來了，原來是4位內地朋友，跟住職員帶我地步行好近，去到內陸機櫃檯chech in ，其實好近，我諗得100多公尺，職員好好服務，替我們安排好一切，原來人都要在行李帶上磅，起初不知，叫我上行李帶做乜？係乘客都要計重量囉！

就係check in 對面有個候機室，專給我們用的，職員叫我地入去等1340 boarding，裡面好舒服，有各式飲料，飯麵、咖哩、牛肉、廁所、沖涼間、吸煙區，招呼周到，我地係度食埋免費lunch （慳番），好快夠鐘上機，都是好隨便，係跑道行上機，坐的是小型螺旋槳，大概30多個位，我坐螺旋槳窗邊，未試過，幾得意！一起飛就見到好多珊瑚礁群，藍藍的海水好美好美！飛咗20分鐘左右到舊機場，之前機組人員已問我地是否去The Residence Maldives ，叫我地第二站下機，所以我地無動作下機，但我見到與我們一起的4位內地朋友準備下機，立即用有限的普通話叫停他們，好彩！否則下了機就麻煩了！

停了15分鐘左右又起飛，今次飛了約40分鐘就到新機場Koondoo，出機場又有職員招待，兩手空空上冷氣車，不到1分鐘就到小型碼頭，乘坐舒適快艇去酒店，9分鐘就到啦，好美好藍好綠的天空、海水、加上滿臉笑容的職員歡迎我們，哇！第一感覺：正、美。

跟著，帶我們去Reception check in完，club car 送我地去327室，酒店照我們原先要求，安排妥當：日落房、遠離main lobby（靜啲），入房又係：正、美，望著無邊際的海，1500呎有廳、房、廁所、浴室、戶外浴室、面海浴缸、陽台、泳池。

到房已經下午4點幾，老婆放好行李，睇下日落海景，晚上7點幾叫club car 到 dinning room，就是第一晚認識waiter Mr. Hafiz，佢經常笑容滿面招呼周到，餐廳內又見到4位朋友，開始交談熟絡，晚餐分頭盤、主菜、甜品，我們的package 包早晚餐，不包飲品，飲品超貴，是晚叫了1支1. 5公升礦泉水7美元，有啲菜式要加錢，由4至18美元不等，雖然覺得好貴，但是它們的出品真的好味好美，你看得出是用心去做的，餐廳是在沙灘邊（當然啦，整個酒店都在沙灘上），剛好月亮倒影照著過來，你說美不美？

影著餐廳內每對蜜月情侶，包括我和老婆20年蜜月，大家都望著望著陶醉著，這頓飯吃到晚上9點半，就散步回房，差不多10分鐘才回到，都幾遠，夜色之下，在海上6呎闊橋面漫步，望下腳下澎澎聲海水，不知下面有什麼生物？一排水上屋在面前，在月影星光燈照下，了無人影，除了我和老婆，很浪漫喎！